કેનેડાના પ્રોત્સાહનને કારણે ખાલિસ્તાનીઓ એટલા ઉત્સાહિત થઇ ગયા કે હવે ખાલિસ્તાનિઓ દ્વારા અયોધ્યાના શ્રી રામ મંદિરને નિશાન બનાવવામાં આવ્યું છે. તેમજ સીધી ધમકી આપવાનું શરુ કરી દીધું છે. ખાલિસ્તાની આતંકવાદી ગુરપવંત સિંહ પન્નુએ એક વીડિયો દ્વારા જાહેરાત કરી હતી કે હિન્દુઓની આસ્થાના કેન્દ્ર શ્રી રામ મંદિરને બોમ્બથી ઉડાવી દેવામાં આવશે.
આતંકવાદી સંગઠન શીખ ફોર જસ્ટિસના ચીફ પન્નુએ જાહેર કરેલા વીડિયોમાં કહ્યું, '16 અને 17 નવેમ્બરે અયોધ્યાના રામ મંદિરમાં હિંસા થશે.' કહેવામાં આવી રહ્યું છે કે પન્નુએ આ વીડિયો કેનેડાના બ્રેમ્પટનમાં રેકોર્ડ કર્યો છે. આ વીડિયોમાં રામ મંદિર તેમજ અન્ય ઘણા હિંદુ ધાર્મિક સ્થળો સામે હિંસા ભડકાવવાની ધમકી પણ આપવામાં આવી છે.
વીડિયોમાં પન્નુએ આગળ કહ્યું, અમે હિન્દુત્વ વિચારધારાની જન્મભૂમિ અયોધ્યાનો પાયો હચમચાવી નાખીશું.' પન્નુની આ ધમકીને ભારતના સૌથી પવિત્ર સ્થાનોમાંથી એક (રામ મંદિર) માટે સીધો ખતરો માનવામાં આવી રહ્યો છે. પન્નુના વિડિયોમાં પીએમ મોદી અયોધ્યા રામ મંદિરમાં પ્રાર્થના કરતા હોવાની તસવીરો પણ જોવા મળે છે. ખાલિસ્તાની આતંકવાદીએ કેનેડામાં રહેતા ભારતીયોને હિન્દુ મંદિરો પરના ખાલિસ્તાની હુમલાઓથી દૂર રહેવાની ધમકી પણ આપી છે.